الجمعة خير يوم طلعت عليه الشمس

عينيكى اصلا فرعونيه

عينيكى اصلا فرعونيه 
السحر فيهم ليل نهار
ولولا إنى بخاف عليكى
لابلغ انك م الاثار
فرعون زمان لو بص ليهم
كان يعترف بوجود إله
وانا لما شوفت الكحل فيهم
عقلى تاه
والورد فوق بستان خدودك
لو شافوه
لا كانوا حسوا جمال ف لوتس
ولا حبوا حتى يقدسوه
ورموش بلون الليل
تضلل ع القمر
بتعلم الصبر الجميل
وتحبب الكون ف السهر
وان كات حياتنا زيهم
او كنتى عايشه ف وقتها
كانت ملامحك ع المعابد تترسم
من حسنها
وتكونى اّيه للدلال
وحجر اساس علم الجمال
وكليوباترا تبان قصادك
زى صفر على الشمال
نجمه وبعيده ف الفلك
وانا كل حلمى انى اوصلك
ومجاش ف بالى ان النجوم
لا بتتوصل ولا تتملك
يابعيده عن كل العيون
وقَريبه من قلبى انا
واصل ف حبك للجنون
وانتى كأنك مش هنا
ولا م الفراعنه ولا انا ملك
انا عندى قلب الشوق ماليه
والحب كل ما امتلك
واتمنى انك تقبليه